KI og pedagogikk-konferanse i Sogndal – september 2025
9. september 2025 i Sogndal samlar vi fagmiljø, forskarar og lærarar til ein konferanse om kunstig intelligens (KI) og korleis ny teknologi endrar læring og undervisning. Målet er å fylle Sogndal Kulturhus med deltakarar som vil utforske korleis KI kan gi nye moglegheiter i klasserommet.
Harvard-professor Sarah Newman er hovudinnleiar og vil dele innsikt i korleis lærarar kan bruke KI aktivt i undervisninga for å skape meir engasjement og betre læringsutbytte.
Konferansen er eit samarbeid mellom Høgskulen på Vestlandet (HVL), IT-forum Vest og eit nasjonalt nettverk for framtidas klasserom (FCL) om pedagogikk og teknologi. Målet er å styrke det tverrfaglege samarbeidet om IKT og undervisning, både internt på HVL og i regionen.
Eit løft for samarbeid og kunnskapsdeling
I september i år vart det arrangert ein workshop på Campus Sogndal, med 50 deltakarar både fysisk og digitalt. Der deltok 30 medlemmer frå eit regionalt nettverk for pedagogikk og IKT i Sogn, fleire fagmiljø ved HVL, Vestlandsforsking og IT-forum Vest. Workshopen la grunnlaget for vidare satsing på samarbeid og kompetanseutvikling innan KI og utdanning.
Under årets workshop innleidde Odin Nøsen, som har erfaring frå Randaberg-skulen, med ei praktisk tilnærming til korleis pratemotorar kan brukast i skulen. Panelsamtalen som følgde, leidd av Kristine Ludvigsen frå Avdeling for utvikling av læring og undervisning ved HVL, sette fokus på:
Bruken av KI i skulen
Pratemotorar i læringssituasjonar
Samarbeid på tvers av aktørar innan kunstig intelligens, skule og utdanning
Panelet inkluderte sentrale fagpersonar som Øyvind H. Larsen (IT-forum Vest), Malin Waage (Vestlandsforsking) og Anne Kristin Rønsen (HVL – Eining for utdanning).
Satsar på ein nasjonal møteplass
Konferansen i 2025 har ambisjonar om å bli ein nasjonal møteplass som:
Styrkar rekrutteringa til pedagogiske utdanningar ved HVL
Byggjer vidare på IT-forum Vest sine tradisjonar med fagkonferansar på tvers av oppvekst og skuleslag
Gjev lærarar og andre ressurspersonar konkret læring og inspirasjon til sin arbeidskvardag
IT-forum Vest bidreg aktivt til planlegginga av arrangementet, i samarbeid med HVL. Konferansen skal også vere ein del av HVL si satsing på profesjonsfagleg pedagogisk utdanning, med fokus på praktiske verktøy som pratemotorar og KI-teknologi.
Hald av datoen og ta del i framtidas klasserom!
Denne konferansen er for alle som er engasjerte i teknologi, utdanning og korleis KI kan forme framtida. Vi ser fram til å samle inspirerande fagpersonar og skape ein arena for kunnskapsdeling og nettverksbygging.
Hald av datoen: 9. september 2025 – Sogndal Kulturhus. Vi vil gje meir informasjon og opne for påmelding her rundt påske. Har du innspel eller idear til konferansen, ta kontakt med Øyvind Heimset Larsen
Foto frå paneldebatten på hybridseminaret 10.september 2024 på Campus Sogndal. Frå venstre: Kristine Ludvigsen, Malin Waage, Øyvind Heimset Larsen og Anne Kristin Rønsen